ரகசியங்களின் ஒற்றைச்சாவி

நிழல்களற்ற ஓர் இரவில் நடக்கும் உங்கள்
பின்கழுத்தில் படரும்
மிக மெல்லிய மூச்சுக்காற்று
என்னுடையதாகவும் இருக்ககூடும்.

 பிரதிபலிக்க பிம்பங்களின்றி
 தன் பாதரசம் தின்று செரிக்கும்
பழைய கண்ணாடி ஒன்று
உங்கள் பரணில் இருக்ககூடும்

எழுத தொடங்கி முடியா கடிதமொன்று
தூசு படிந்த புத்தகத்தின்
96-ம் பக்கத்தில் இருக்ககூடும்

 முன்னொரு மழைநாளில்
தேநீர் கோப்பைகளுக்குள்
விழுந்த வார்த்தைகள் யாருமறியாமல்
மௌனம் போர்த்தி ஒளிந்திருக்ககூடும்

 நம்பிக்கையின் குருதி தோய்ந்த
ஓர் துரோகத்தின் கூர்வாள்
இன்னும் உயிர்ப்போடு பதுங்கியிருக்ககூடும்

 இவையனைத்தும் காக்கும் பொருட்டு
ரகசியங்களின் ஒற்றை சாவியை
இறுக பற்றியபடி

நிழல்களற்ற ஓர் இரவில் நடக்கும் உங்கள்
பின்கழுத்தில் படரும்
மிக மெல்லிய மூச்சுக்காற்று
என்னுடையதாகவும் இருக்ககூடும்.